كلام جميل في العيش المشترك اللبناني
في مَتل بيردِّدوه إخوتنا المسلمين
وسامعو أكتَر مِن مَرَّه
وكان يستَرعي إنتباهي وهوِّ:
" الله يكَبِّر الصَّليب بهالبَلَد"!
أكيد بيقصد المَتَل إنو الصّليب ضمانِه للمَسيحيين والمسلِمين سَوا.
الخلطَه السِّحريِّه اللي خَلِّت بَلَدنا حِصرمِه بعيون المتطرّفين،
واللي لَحَدّ هَلَّق جَنّبتنا ويلات أيمَن الظّواهِريوأوساما بِن لادِن وأبو مِصعَب الزِّرقاوي ومؤخّراً أبو بَكر البَغدادي،
هَيي إنو المسيحي والمِسلِم بلبنان عايشين سَوا بفَرد بيت وفَرد مَكتَب وفَرِد مدرَسِه وَفَرد جامعَه وفَرد شارِع وفَرِد حَقلِه..
بلبنان بيتزَوَّج المَسيحي من مسلِمِه والمسلِم من مَسيحي وما بيتغَيَّرشي بِحَياتُن،
لأنو في كتير إشيا مشتَرَكِه حتّى بين الدّيانتَين.
نَحنا بزَمن رَمَضان هالشَّهر الفَضيل.
صَدّقوني بَعرِف مِسيحيّي ماسكين واجِب مَع المسلِمين وصايمين مَتلُن وهالشّي بينطِبَق كَمان عا صيام المَسيحيي وياما شايف مَسيحيي عَميِفطَرو عا ضَرب المَدفَع وياما شايِف مسلِمين بالطّابِق الأوَّل من البنايِه عَميبعَتو صَحن قَواطِع لجَيرانن المَسيحيي عالطّابِق التاني.
المَسيحي بيقول "رَمَضان كَريم" مِن كِلّ قَلبو
متل ما المِسلِم بيقول "ميلاد مَجيد" مِن كِلّ قَلبو.
لَمّا بيجينا وَلَد منفرَح سَوا
ولمّا منفقد غالي منِنعيه سَوا.
بلبنان مِنهَنّي بَعضنا بأعيادنا الدينيِّه
وياما فايت عا بيوت أصدِقاء مسلِمين وشايِف فيها شَجرِة الميلاد خَمس متورا مَع مَغارِة بيت لَحم والعَدرا ومار يوسف السلام عا إسمُن.
بتِفتَح القرآن الكَريم وبتِقرا عن مَريَم العَدرا بسِورِة مَريَم كلام بِغايِة الألوهَة بالإنجيل المقدّس نَفسو مَ بِتقراه!
طْلَعو بِالويك أند عا حيالله مَزار أو دَير أو صَومَعَه خصوصاً بالجبال بِتشوفو نِسوان مَحَجِّبِه خاشعَه أمام القِدّيسين عا مَدبَح الكنيسِه وبتشوفو المَسيحّيين مِتل المِسلِمين عَميضَوّو شموع عا نيِّة أهلُن ومَرضاهُن ومَوتاهُن.
أنا شايِف صُوَر وتَماثيل لَقدّيسين ببيوت مسلِمين أكتَر ما شايِف منها ببيوت مَسيحيِّه.
مارون عَبّود المَسيحي سَمّى إبنو محَمَّد ومسلمين كتار سّموهُن أهاليهُن أسماء مَسيحيِّه.
فوتو عا مَدارِس الرّهبان والرّاهبات والإرساليّات بلبنان وعِدّو فيها التلاميذ المسلِمين بتتفاجَأو.
لبنان بَلَد عِلماني للعَضِم رغم طائفيِّة نِظامو السياسي عَكس كِلّ الدّوَل المُحيطَه.
لبنان البَلَد الوَحيد اللي بتسمَع فيه جَرَس الكنيسِه وصَوت الأذان بعاد مِترَين عَن بَعضُن.
ميشان هَيك أنا مِش خايِف من داعِش على لبنان
ولا خايِف من أبو بَكر البَغدادي على لبنان.
هَودي كِلُّن فقّاعات صابون
ولبنان وَحدو باقي!
أروني ألفا
المصدر :
٣/٧/٢٠١٤
مواضيع ذات صلة
التطرف والتكفير ينسفان حرية ممارسة الشعائر الدينية في لبنان!
Envoyé de mon Ipad
Aucun commentaire:
Enregistrer un commentaire
Bienvenu